Кинде заводлан полшаш сӧреныт

          Республикысе кинде завод-влак субсидийым налыт. Киндым ыштен лукшо предприятий- влак тений кугыжаныш деч 22 миллион теҥгем налыт. Социал продукций-влаклан субсидий 2021-ше ий годсек ял озанлыкым вияҥдыме программе кышкарыште пуалтеш. Марий Элым вуйлатышын пашажым шуктышо Юрий Зайцев Оршанке районыш мийымыже годым «Оршанкысе кинде» ушемышкат пурен. Предприятийын директоржо Нияз Гараев палемден: предприятий талукышто кум тӱжем тонн киндым да кинде сатум ыштен луктеш. Сату Республике мучко да Киров кундемысе Яраҥ районыш, Йошкар-Ола, Озаҥ, Волжск олаласе социал тӧнеж ден эмлыме верлашке колталтеш. А тӱҥ налшыже- районысо да рӱдӧ оласе калык. Ончыкыжым ассортиментым кугемдымылан да у автомат линийым колтымылан кӧра утларак сатум лукташ, паша лектышым кугемдаш да у пашаверым ешараш шонат. Республикым вуйлатышын пашажым шуктышо предприятийлан сатум ужалаш йӧным ышташ сӧрен.
             Фото: Марий Элым вуйлатышын организаций да аналитик виктемже.