Кокшамарий яллан 475 ий темын

           Кокшамарий яллан 475 ий темын. Провой велысе тиде ял 475-ше шочмо кечыжым палемден. Тиде ялыште республикын ятыр лӱмлӧ еҥже шочын. Лӱмгече кечын Какшамарийыште калыкле тӱвыран «Какшан ӱмбалне шонанпыл» районысо фестиваль эртен. Тудо вич ийлан ик гана эртаралтеш. Тушко калыкле усталык коллектив, ансамбль, мурызо, музыкант, кид-паша мастар- влак уло район да пошкудо кундемла гычат толыныт. Кокшамарий марий ялым 1547-ше ийыште негызлыме. Тудо Кугу Какшан эҥерын Юлыш йоген пурымо тураште верланен. Шке ялыштым композитор-влак  Иван Ключников-Палантай ден Яков Эшпай, сотемдарыче Николай Орлов, икымше марий ӱдырамаш-революционер Агриппина Боброва- Ишпайкина, Совет Ушемын Геройжо Михаил Кологривов, Слава орден-влакын кавалерже Павел Хлебников да молат чапландареныт.
          Звенигово район администрацийын фотожо. «Марийская правда» газет.