Аварийный пӧртла гыч калыкым кусарымашым шуйкалаш ок лий

             Аварийный пӧртла гыч калыкым кусарымашым шуйкалаш ок лий, - каласен республикым вуйлатышын сомылжым шуктышо. Юрий Зайцев оперативный совещанийын участникше- влак дене кундемлам комплексно вияҥдыме проект- влакым шыҥдарыме йодышым каҥашен. Чоҥымаш, архитектура да ЖКХ министр Михаил Степанов палемден: проект- влакын тӱҥ цельышт еҥ- влаклан йӧнан лийже манын тыршымаш да 5 ойпидышым шыҥдарыме нерген ойлен. Тыге Йошкар-Олаште 77-ше кварталын ужашыже проектыш пурталтын. Тиде Машиностроитель, Рябинин, Ленин проспект да Сеҥымаш бульвар кокласе кумдык нерген ойлалтеш. Тушто 13 тошто пӧртым кораҥден, шуко пачашан пӧрт- влакым чоҥаш палемдыме. Тыге ола покшелне сай микрорайон лийшаш. Тиддеч посна Воин-Интернационалист- влак, Карл Либкнехт, Киров да Ленин проспект коклаште верланыше Театральный микрорайон вияҥшаш. Тушто ныл пӧртым кораҥден, 6 пӧртым чоҥаш палемдыме. Соловьёв, Пугачёв, Тургенев да Павлов уремла коклаште кум тошто пӧртым кораҥдат да 9 пачашан пӧртым нӧлтат. Тыгак Медведево районысо Кугу Ноля ялыште 40 посна пӧртым чоҥаш палемдыме. Медведево посёлкысо Чавайн уремыште вич тошто пӧрт олмеш 8 пачашан пӧрт- влак лийшаш улыт. Михаил Степанов тыгак чоҥымо материаллан акын кушмыжо нерген ойлен да 300 миллион теҥгем ешарен ойыраш йодын. Юрий Зайцев акын вашталтмыжым шотыш налын у рассётым ыштен пуаш йодын да программе почеш пӧрт- влак обязательно чоҥен шуктыман манын. Калыкым кусарыме программым чарак да жапым пудыртыде илышыш шыҥдарыман манын каласен.
             Фото: Марий Элым вуйлатышын организаций да аналитик виктемже.