«Пеледыш пайрем» чылам куандарыш

          Эртыше шуматкечын Йошкар-Олаште калыкле тӱвыран «Пеледыш пайрем» Россий кӱкшытан фестивальже гӱжен эртыш. Пайремыш 30 тӱжем утла еҥ толын. Делегаций- влак чыла гаяк район гыч, Татарстан, Башкортостан, Одо кундем, Киров, Угарман, Свердлов областьла. Пермь край гыч толыныт. Марий Элым вуйлатышын сомылжым шуктышо Юрий Зайцев марий калыкын йӧратыме пайремыштыже калыкым саламлышыла каласен: Мый тӱрысынек ӱшанем- Пеледыш пайремлан официальный пайрем статусым пуаш шонымаш дене Кугыжаныш Погыныш лекмына дене пеш чын ыштен улына. Тиде чынжымак марий калыкын пырля ушнымо да келшыме пайремже. Тыгай пайрем шукырак лийшаш,- каласен тудо. Кугыжаныш Погыным вуйлатыше Анатолий Смирнов ешарен: Погынын депутатше- влак чыланат тиде темлымаш дене келшеныт да 30-шо июньышто, 28-ше сессийыште пайремлан официальный статусым пуымо шотышто документ пеҥгыдемдалтеш. Торжественный ужаш деч вара Юрий Зайцев пайрем колонныш ушнен, мер каҥашын тистыже дене Рӱдӧ паркыш ошкылын. Тушто коман мелнам, пурам тамлен, марий кудо- влакым ончен савырнен. Моло кундемла гыч толшо артист- влак Марий Элысе коллектив- влак дене пырля тӱрлӧ площадкыште шке мастарлыкыштым ончыктеныт. Пошкырт кундем гыч тений кугу делегаций толын да эрвел марий артист- влак посна концертым ямдыленыт, районлаште, Патриарший площадьыште, Ленин лӱмеш площадьыште погынышо калыкым куандареныт. 
             Фото: Марий Элым вуйлатышын организаций да аналитик виктемже.