Марий Элым вуйлатышын сомылжым шуктышо республикысе да муниципал СМИ-н вуйлатышышт дене вашлийын

             Марий Элым вуйлатышын пашажым шуктышо тыгай шонымашым каласен: «Калыкын ӱшанжым тыге гына сулен налаш лиеш: сӧренат- ыште. Вес рецептым ом пале». Тидын нерген Юрий Зайцев республикысе да муниципал СМИ-н вуйлатышышт дене вашлийме годым ойлен. Тӱҥ редактор- влак дене мутланыме годым, нунын коллективыштым чаткан пашам ыштымыштлан тауштен ойлен. Вашлиймашке чыла СМИ вуйлатыше погынен- газетын, телевиденийын да радион. Тӱшка увер йӧн - тиде кугу да куатле вий. Тудым таклан огыл нылымше кучем маныт. СМИ южгунам еҥын гына огыл, элын пӱрымашыжымат виктарен кертеш,- каласен Юрий Зайцев да ешарен: кызыт социал вот кугу верым налеш. Тусо комментарий- влакым мый эре лудам.
             Погынышо- влак ятыр темым нӧлталыныт да вуйлатышылан йодыш- влакым пуэныт. Иктыже тыгай лийын: республикыште у еҥлан верысе калыкын ӱшанжым кузе сулен налман? Ик принцип гына,- манын тудо- сӧренат ыште. Шуктен от керт гын, лучо итат сӧрӧ. Ӱшаным паша лектыш дене гына сулен налаш лиеш. Мут дене огыл а лектыш дене. Сӧренат- ыште. Вес рецептым ом пале,- палемден Юрий Зайцев. Тенийсе эн тӱҥ паша- влак радамыште ондак тӱҥалме пашам мучашлымым, у мероприятий планым ыштымым палемден. Тидын годым калыкын йодышыжо, вуйшиймашыжлан, кӱлешлыкшылан эҥертыман.
              Журналист- влак тыгак вуйлатышын Марий Эл нерген могай шонымашыже шочмо нерген йодыныт. Тудо эн ончычак кундемын пӱртӱсшӧ куандарен, ӧрыктарен. Вара калыкын порылыкшо кумылым савырен манын.
             Фото: Марий Элым вуйлатышын организаций да аналитик виктемже.