«Илыш ӱмыржат пеш кужу, шонышым…»
Эрла Марий самырык театрын сценыштыже Марий Элын калык артистше Игорь Актугановым шарныме лӱмеш «Илыш ӱмыржат пеш кужу, шонышым…» концерт кас лиеш. Шарнымаш кас 18 шагатлан тӱҥалеш. Игорь Актуганов Звенигово районысо Эҥервож ялыште 1975-ше ийын нылымше сентябрьыште шочын. 1993-шо ийыште тӱвыра колледжыш тунемаш пурен да вигак театрыште модаш тӱналын. 2005-ше ийыште Российысе театр сымыктыш академийын актёр факультетшым тунем пытарен. Марий Элын калык артистше, Олык Ипай лӱмеш кугыжаныш молодежный премийын, Йыван Кырла лӱмеш калыкле театр премийын, «Калшымаш кӱвар» руш театр- влакын Тӱнямбал фестивальыштын лауреатше лийын.