Алла Орлован лӱмгечыжлан пӧлеклалтше посна ончерже почылтеш
Республикысе тӱс сымыктыш тоштерыште 15-ше февральын 16 шагатлан Алла Орлован лӱмгечыжлан пӧлеклалтше посна ончерже почылтеш. Алла Алексеевна Марий Элын сулло сӱретчыже, кугыжаныш премийын лауреатше, Россий сӱретче- влак ушемын еҥже. Тудо Йошкар-Олаште 1962-шо ий 13-шо февральыште уста ешеш шочын. Аваже- Лидия Александровна марий тӱрым пӧртылтымӧ да вияҥдыме пашаште шоген. Ачаже- Алексей Григорьевич республикысе сӱретче- влак ушемым ыштымаште тыршен. Алла Алексеевна президент школышто калык тӱрым да станковый композицийым туныкта, икымше номеран йоча художественный школым вуйлата. Ончерыште тудын марий тӱр дене кылдалтше пашаже- влакым ужаш лиеш. Ик эн ойыртемалтше пашаже- Марий Эл Кугыжаныш Погынышто аралалтше, Марий Элын шке кид дене тӱрлымӧ кугу картыже. Тудо лапка административный сӱрет ден марий тӱрым иктеш ушен кертын.