Ковид дене черланыше- влак дене кылым кучышо- шамычым обязательно изолироватлаш йодмашым кораҥдыме

              Ковид дене черланыше- влак дене кылым кучышо- шамычым обязательно изолироватлаш йодмашым кораҥдыме. Кудымшо февраль гыч Российысе тӱҥ кугыжаныш санитар врачын пунчалже вийым налын. Тудын дене келшышын обязательный изоляций кораҥдалтеш. Тыге черле дене кылым кучышо еҥ семын изоляцийыште лийше- влаклан 6-шо февраль гыч карантин кораҥдалтын. Тыгак чер ик арня жапыште эрта гын ковидлан тестым ышташ ок кӱл. Ковидым пеҥгыдемден ончыктыман еҥым эмлымаш шым кече деч шагал шуйна гын, ик отрицательный тестым ыштымеке пашаш але тунемаш лекташ лиеш. Стационарыште эмлалтше- влак ик отрицательный анализышт уло гын, эмлалташ мӧҥгӧ колталтыт. Вашталтыш мо дене кылдалтын? Омикрон штамм дене черланымаш вес семын эрта. Тудо утларак ОРВИ дене келшен толеш. Республикысе инфекций стационарлаште кызыт 800 утла пациент эмлалтеш. Ик суткаште 22 еҥ эмлалт лектын, 61 еҥым эмлаш пыштыме. 728 еҥ пневмоний деч эмлалтеш, 535 еҥын коронавирус инфекцийым пеҥгыдемден ончыктымо. Ик суткаште республике мучко 520 еҥлан коронавирус инфекций диагнозым пеҥгыдемдыме. Пандемий тӱналме годсек чылаже 35 тӱжемат 300 утла еҥын чержым рашемдыме, 29 тӱжемат 100 утла еҥ эмлалт лектын, 983 еҥ ӱмыр лугыч лийын.