Илыме вер да коммунал озанлык объектлам модернизироватлаш 950 миллион теҥгем ойырат

             Марий Элым социал-экономик велым вияҥдыме индивидуал программе кышкарыште илыме вер да коммунал озанлык объектлам модернизироватлаш 950 миллион теҥгем колтат. Марий Элым вуйлатыше Александр Евстифеев Россий Правительстве председательын алмаштышыже Марат Хуснуллинын регионлам вияҥдыме шотышто Правительстве комиссий Президиумын заседанийыштыже участвоватлен. Погынышо- влак илыме вер да коммунал озанлыкын пашажым каҥашеныт, «Яндар вӱд», «Йӧнан оласе кумдыкым ыштымаш», «Юл эҥерым тазаҥдымаш» проектлам кодшо ийын шыҥдарыме паша иктешленыт. Икымше февральлан шотлымаште Марий Эл «Яндар вӱд» проектым шыҥдарыме дене икымше верыште, «Йӧнан оласе кумдыкым ыштымаш» дене кумшышто, Корным чоҥымаш дене 4-ше, «Юлым тазаҥдымаш» проект дене 6-шо верыште улеш. Марий Элын правительствыже ЖКХ аланыш тӱрлӧ источник гыч оксам кондашлан кӱлешан мера- влакым ышта. Индивидуал программе кышкарыште вӱдым ситарыме шым объектыште, шокшым ситарыме ик объектыште 950 миллион теҥгелан  уэмдыме пашам шукташ палемдыме. Эртыше ийыште 263 миллионым кучылтмо да ныл объектым эксплуатацийыш налме. Тений Волжскышто, Звениговышто, Шоя-Кузнецовышто паша умбакыже шуйна. Мутлан, Кугу Памъялыште у скважине, Красный Мост посёлкышто блочно-модульный котельный чоҥалтшаш. Эше концессий механизым чолган кучылталтеш. Кызыт республикыште куд концессий ойпидыш шыҥдаралтеш.