Тений Марий Элыште 390 тӱжем квадрат метр илыме верым чоҥат

             Тений Марий Элыште 390 тӱжем квадрат метр илыме верым чоҥат да аварийныйлан шотлалтше 27 тӱжем квадрат метр илыме вер фондым кораҥдат. Тений мыняр илыме верым чоҥымо да пашаш колтымо йодышым Марий Элым вуйлатыше Александр Евстифеевын эртарыме совещанийыште каҥашыме. «Илыме вер да оласе кумдык» калыкле проектын «Илыме вер» федерал проектше дене келшышын, тенийлан 390 тӱжем квадрат метр илыме верым чоҥаш палемдыме. Икымше февральлан кодшо ийын чоҥаш тӱналмым шотыш налын 66 тӱжем квадрат метр илыме верым пашаш колтымо. Тений тыгак 330 тулык йочалан пачерым ситараш планыш пуртымо. Республикым вуйлатыше мэрлан ушештарен. Ондак мланде участке- влакым ойырымо ыле. Туште тений илыме верым чоҥымо тӱҥ вер лийшаш. Чоҥымо годым инфраструктурымат- школым, йоча садым вигак чоҥен мийыман манын тудо.