Юл кундем федерал округышто кок мер проектым тӱҥалаш ямдылалтыт
Юл кундем федерал округышто кок мер проектым тӱҥалаш ямдылалтыт. Тиде- самырык- влакын «Иволга» форумышт да стрит-артын «Форм-АРТ» фестивальже. Россий Президентын округышто полномочный представительжын алмаштышыже Олег Машковцев видеоконференцкыл йӧн дене совещанийым эртарен. Тушто нине кок проектым ямдылыме да эртарыме нерген ойлымо. Олег Машковцев ушештарен: сантиар-эпидемиологий сӱретым шотыш налын, тений «Иволга» форум онлайн- формат дене 24-ше гыч 28-ше август марте лиеш. Лӱмын ыштыме платформышто шинчымашым шарыме, проект, тӱвыра да каныме программе- влак лийыт. Чылаже тушко кок тӱжем утла еҥ ушнышаш. Грант фондшо тений 10 миллион теҥге. Форумын пытартыш кечынже, Игорь Комаровын ӱжмыж почеш, регионлам вуйлатыше- влак ӱдыр-рвезе- шамыч дене мутланышаш улыт. Совещанийыште тыгак округысо у проектым стрит-артын «Форм Арт» фестивальжым шыҥдарыме нерген ойлымо. Тудо 7-ше июльыштак тӱҥалын да уремысе сымыктышым вияҥдымашке, самырык сӱретче- влаклан полышым пуымашке, регионлаште кызытсе жаплан келшыше уремысе кумдыкым ыштымашке виктаралтын. Проект кышкарыште коронавирус дене кучедалмым ончыктышо граффитим ыштат. Кызыт икымше йыжыҥже кая. 7-ше август марте ушнаш шонышо- влак деч пашаштым да йодмашым вучат. Тидлан лӱмын проектын сайтшым ыштыме. Финалист- влак шке сӱретыштым пырдыжлаште вераҥден кертыт. Тиддеч посна усталыкым умбакыже вияҥдаш 50 гыч 100 тӱжем теҥге марте грантым пуат.