Российысе чодырам руышо- влак мастарлыкыштым ончыктат
Марий Элыште Российысе чодырам руышо- влак пушеҥгым эн сайын сӱмырышӧ лӱм верч кучедалыт. Тиде арнян чодыра аланыште тыршыше- влаклан кӱлешан событий эрта: «Пушеҥгым эн устан сӱмырышӧ -2020» профессионал мастарлыкым тергыме конкурс. Тудо 2016-шо ий годсек эртаралтеш. Йӱла почеш тудым республикысе пӱртӱс поянлык министерстве ямдыла. Тений конкурс Юлтехын тунемме да опытым эртарыме чодыра озанлыкыштыже лиеш. Эпидемиологий сӱретым ончыде, тудо кугу лияш сӧра. Таҥасымашке Марий Эл гыч гына огыл, Чуваший, Татарстан, Карелий, Удмуртий, Брянск, Угарман, Моско областьла гыч 50 наре участник толшаш. Нуно вич тергымашым эртат: пушеҥгым сӱмырымаш, тудым кок семын пӱчкедымаш, укшым эрыктымаш да бензопилаште цепьым вашталтымаш. Таҥасымаш эрла шым шагат эрдене Юлтехын опытный лесхозыштыжо тӱҥалеш.