Шергакан тошто книга- влак огыт йом

Марий Элыште тошто книга- влакым цифроватлыме паша кая. Сергей Чавайн лӱмеш калыкле книгагудо 2024-ше ий марте 60 шергакан-тошто книгам цифран форматыш кусара. Тӱвыра министерствын увертарымыж почеш паша кодшо ий годсек «Тӱвыра» калыкле проект кышкарыште  шукталтеш. Книгагудын фондыштыжо 140 ий жапыште тыгай шаргакан савыктыш шуко погынен. Нунын коклаште 18-ше 19-ше курымласе кид ден возымо, савыктыме книга- влакат, лӱмлӧ учёный, писатель, мер пашаеҥ-влакын шке кидпалыштым пыштыман да возен кодымыштым аралыше савыктыш, марий сылнымутлан негызым пыштыше- влакын илымышт годымак лекше книгашт, марла лукмо икымше книга- влак улыт. Кодшо ийын 10 книга памятникым цифрыш кусарыме. Нуно тӱҥ шотышто 1830-шо ий марте савыктыме улыт. Тиддеч посна специалист- влак икмыняр тӱжем марла лукмо савыктышым цифрыш кусарат. Тидыже электрон формат дене нуным вашкерак муаш да арален кодаш полша.