Юл эҥер гоч вончымо эше ик паром лийын кертеш
Республикыштына Юл эҥер гоч вончымо эше ик паром лийын кертеш. Тидын нерген Правительствын заседанийыштыже Александр Евстифеев ушештарен. Паром вончем Козьмодемьянск ден Юрино посёлкым ушышаш. Кодшо кечылаште Шеремтев замкым олмыктымо йодышым каҥашыме ыле. Республикым вуйлатыше шижтарен: замкым олмыктен тӧрлаташ веле огыл, туризм пашаланат кучылтман. Сандене Козьмодемьянск гыч Юриныш паромым колтыман. Посёлкысо калык тиде уверым куанен вашлийын. Молан манаш гын, кызыт Юрино гыч Козьмодемьянскыш миен шуаш, Вӱтла эҥерым йыр савырнен, шӱдӧ дене меҥгым эрташ кӱлеш. Адакшым верысе калыкым обслуживатлыше икмыняр кугыжаныш тӧнеж Козьмодемьянскыште верланен. Тыгеже, паром кая гын, туризмым вияҥдаш гына огыл полша, калыкын илышыжымат куштылемда. Шарналташ гын, иктаж 20 ий ончыч паром коштын. Туддеч ончыч ракете- влакат калыкым шупшыктеныт.