Йошкар-Олаште у школ 40 процентлан ямде

Йошкар-Олаште пытартыш 30 ий жапыште икымше у школ чоҥалтеш. Тудым индешымше микрорайонышто нӧлтат. Кызыт тудым 40 процентлан шуктымо. Ончычсо ийлаште республике утларакшым полат- влакым чоҥен, а социал тӧнеж- влак ӧрдыжеш кодыныт. Кызыт мӧҥгешла: йоча сад, школ- влак нӧлталтыт. Теве 9-ше «В» микрорайонышто 825 верлан келыштарыме школын корпусшо раш коеш. Тушто шуко пачашан ятыр у пӧртым чоҥымо, кугу микрорайон кушкын шогалын, школ ок сите. Паша кузе кайымым тергаш  республикым вуйлатыше Александр Евстифеев шке миен. Тиде объектыш тудо ынде кокымшо гана толын. Чоҥышо- влак шуктымо пашашт нерген каласкаленыт. Тачысе кечылан чоҥаш бюджет гыч 85 миллион теҥгем ойырымо да 40 процент пашам шуктымо. Объектым 2020-шо ий 1-ше июльлан ыштен шуктышаш улыт. Александр Евстифеевын мутшо почеш, вик ончалмаште чыла сай, чоҥышо- влак деке нимогай йодыш уке. Лишыл жапыште тушко шокшым пуышаш улыт. Кызыт кумшо пачашым мучашлат, леведышлан ямдылат. Иканаштак теплосеть, вӱд пуч ышталтеш, окна- влакым шындат. А телым, шокшым пуымеке, кӧргыштӧ пӧлем- влакым ышташ тӱналыт. Шушаш ийын мебельым налыт. Проект почеш школ пелен стадион, виш спорт площадке лийшаш. Тушто теннис корт, ядром кышкыме площадке, футбол пасу да спортын гимнастике видше дене шуаралтме кумдыкым ыштат. Шушаш ийын республикым вуйлатыше икымше сентябрьым тыште вашлияш сӧрен.