«Рывыж кеч-мыняр чоя лиеш, ний оптышеш садак пижеш»

Республикысе правам аралыше органын пашаеҥже- влак электроинструментым шолышташ йӧратыше еҥым кученыт. Козьмодемьянск гыч 40 ияш ӱдырамаш полицейский- влаклан увертарен: монча гыч бензопилам, бензосавам да самоварым шолыштыныт. Шолыштшо еҥын петырыдыме окна гыч пурымыжым рашемденыт. Кычалме годым полицейский- влак ондак судитлалтше 28 ияш пӧръеҥым кученыт. Рашемын: ондакат Козьмодемьянск оласе пачер гыч электроӱзгар- влакым шолыштын. Тудо сурам пудыртен да перфораторым, шуруповёртым, шлифовальный машинам наҥгаен. Тудо шке шолыштмыж шотышто титаклымылан тореш лийын огыл. Чыла ӱзгарым поген налме.