Российын Геройжо Марк Евтюхиным шарныме лӱмеш самбо кучедалмаш дене таҥасымаш лиеш

21-ше-22-шо сентябрьыште Йошкар- Оласе «Юбилейный» спорткомплексыште самбо дене Российын Геройжо Марк Евтюхиным шарныме лӱмеш регион- влак кокласе таҥасымаш лиеш. Тушко 16 ияш марте ӱдыр-рвезе- влак ушнат. Сеҥыше- влакым 2004-ше - 2005-ше ийлаште да 2006-шо -2007-ше ийлаште шочшо- влак коклаште ойыраш тӱҥалыт. Ончылгоч вашлиймаш 21-ше сентябрьыште 11 шагатлан, финалже 17 шагатлан тӱҥалеш. Вес кечынже таҥасымаш- влакым 10 шагат гыч ончаш лиеш. Сеҥыше да призёр- влак медаль, кубок, Чап кагаз, шерагкан пӧлек дене палемдалтыт.