Марий Элыште илыше азербайджанец- влак регионысо калыкле-тӱвыра автономийым ыштеныт
Марий Элыште илыше азербайджанец- влак регионысо калыкле-тӱвыра автономийым ыштеныт. Автономийын учредительный конференцийышкыже Моско гыч Российысе азербайджанец- влакын федерал калыкле тӱвыра автономийыштым вуйлатыше Мехрибан Садыгова дене пырля делегаций толын. Верысе автономийым вуйлатыше Октай Гусейновын мутшо почеш, пытартыш кок ийыште кугу пашам ыштыме. Автономийын цельже Марий Эл ден Азербайджан коклаште пеҥгыде кылым ыштымаш. Посна теме- вуз- влак коклаште студент- влакым вашталтен туныктымаш. Республикысе тӱвыра министрын алмаштышыже Галина Ширяева калык- влакын келшен илымаштышт калыкле мер ушем- влакын кугу рольыштым палемден. Марий Элыште кызыт кум калыкле-тӱвыра автономий пашам ышта- еврей, татар да азербайджанец- влакын. Азербайджан общинылан татар тӱвыра рӱдерын кумдыкшо дене пайдаланаш темлыме. Старейштна- влакын советыштым вуйлатыше Таджуддин Касумовын мутшо почеш, марий- азербайджан кыл 30-шо ийлаштак пеҥгыдемаш тӱналын. Тунам, 1930-шо гыч 1935-ше ий марте партий марий обкомын икымше секретарьжылан азербайджанец Алигейдар Ибишевич Ширвани ыштен. Тудлан шарнымаш оҥам вераҥдаш темлыме. Кызытат республикыште икмыняр вуйлатыше азербайджанец улыт. А 18-ше октябрьыште Москошто российысе азербайджанец- влакын федерал калыкле тӱвыра автономийышт ден азербайджан тӱвыра да йылме рӱдер калыкле тӱвыра автномий- влакын йодышышт дене шанче-практик конференцийым эртарат.