Мланде участкым ужалкален пояш шонышо- влакым 10 ийлан петыреныт

Ончычсо чиновник- влакым мланде участке дене ондалкалымылан кажныжым 10 ийлан петыраш ыштыме. Республикын Верховный судшо прокуратурын еҥже дене келшен да титаклыме еҥ-влакын да нуным аралыше- шамычын вуйшиймашыштым кораҥден. Июльышто Йошкар-Оласе ола суд Медведево районысо мланде поянлык да муниципал погым виктарыме шотышто комитетын ончычсо кок пашаеҥже шотышто уголовный паша почеш приговорым луктын. Нуным шояклен налме погым кучылтмылан да кугу окса дене шолып пашам ыштымылан титаканлан шотлымо. Судышто рашемдыме: нуно 2012-шо гыч 2014-ше ий марте Пекшиксола ял илемыш пурышо Новый посёлкышто да Тойкан ялыште 98 мланде участке дене пайдаланаш закондымын правам налыныт. Тыге 111 миллион теҥгелан эҥегекым конденыт. 53 участкылан налме-ужалыме шотышто шояк документым ыштеныт. Тыге 7 миллион утла теҥге парышым налыныт. Осал пашам Медведево прокуратура рашемден. Прокуратурын кӱштымыж почеш, муниципал погыш 64 участкым мӧҥгеш пӧртылтымӧ. Суд ик чиновникшым 10 ийлан эрык деч посна кодаш, исправительный колонийыш колташ да 900 тӱжем теҥге штрафым тӱлыкташ ыштен. Весыже исправительный колонийыш 10 ият пелылан кайышаш, ик миллион теҥге штрафым тӱлышаш. Коктынат 4 ий жапыште нимогай должностьым айлен огыт керт. Приговор законло вийым налын.