Сеҥымаш кече вашеш Воин Чап мемориалым уэмдаш палемдыме
Сеҥымашлан 75 ий темме вашеш Йошкар-Олаште Воин Чап мемориалым уэмдаш палемдыме. Олмыктымо да уэмдыме паша мемориал ансамбльыш пурышо чыла объектыштыжат лиеш. Тушко «Сеҥыше воин», «Курымашлык тул», Герой-влакын аллейышт, Радиаций катастрофылаште вуйым пыштыше- влаклан да Верласе сарыште вуйым пыштыше-шамычлан мемориал- влак пурат. Воин Чап мемориалым уэмдыме шотышто республикым вуйлатыше Александр Евстифеев ден олан мэрже Евгений Маслов рӱдӧ паркыште раш мутланымашым эртареныт. Александр Евстифеев палемден: игечын йӧнан годым ыштышаш пашажым тенияк шукташ тӱҥалман. Мутлан, волгалтарыме системым ышташ лиеш. Брусчаткымат южо вере вашталтыман. Рӱдӧ паркын директоржо Андрей Шестаковын мутшо почеш, «Сеҥыше воин» чапкӱ воктене гранит плитам да Курымашлык тулын постаментшым олмыктыман, бронзо гыч ыштыме шӱдырым вашталтыман. Радиаций катастрофа да верласе сарлаште вуйым пыштыше- влаклан мемориаллам эрыктыман, возымыжым уэмдыман. Евстифеев тиде кундемжымат тӱзаташ кӱлеш манын. Шушаш ий – лӱмгече идалык. Сеҥымаш кечылан пӧлеклалтше ий лиеш. Президентын Указше дене тудым Шарнымаш да Чап идалык семын увертарыме. Тудын кышкарыште комплекс-влакым уэмдышаш планым ыштыме. Историй шарнымашым арален кодымаште кугу задаче шындалтеш,- каласен республикым вуйлатыше. Самырык тукымым патриотизм шӱлышеш шуараш «Патриот» Парк ышталтеш, «Авангард» федерал проект шыҥдаралтеш. Александр Евстифеев тыгак Сеҥымаш лӱмгече ден Воин Чап монументлан 45 ий теммын ик жапыште толмыштым символ шотан манын палемден. Курымашлык тулым 1975-ше ий 9-ше майыште чӱктымӧ. Факелым Ленинградыште Пискарёв шӱгарласе Курымашлык тул деч ылыжтыме да Йошкар-Олаш бронетранспортёр дене Совет Ушемын Геройжо А.Владимиров ден сарын ветеранже Н.Васильев конденыт. 1975-ше ийыштак монументал чапкӱ- влакын Сеҥымаш кечылан пӧлеклалтше Всесоюзный выставкыштышт Йошкар-Оласе Воин Чап монументым ик эн сайлан шотлымо. Тудым ыштыше- влак СССР ВДНХ-н медальже дене палемдалтыныт: Анатолий Ширнин- шӧртньӧ, Николай Ведерников –ший, эн уста чоҥышо- влак той медальым налыныт.