Йӱшаш вӱд сай, но ситыдымашат уло

Республикысе эпидемиолог- влак кундемыштына йӱшаш вӱдым сайлан шотлат. Теҥгече вӱдын качаствыжым тергыме тӱнямбал кече палемдалтын. Роспотребнадзорын Марий Элысе виктемже январь гыч август марте вӱдым ситарыме централизванный верла гыч вич тӱжемат 128 пробым налын да микробиологий шотышто гигиена нормативлан келшен толмыжым, кум тӱжемат 700 утла пробым санитар-химий показатель дене терген. Икымшыштыже 54 пробо йодмашлан келшен толын огыл, тидыже ик процент лиеш, кокымшыж дене 159 пробым начарлан шотлымо. Тидыже ныл процент. Тыглай тавыла гыч 176 да 142 пробым налме. Тушечын 12 да 8 пробо келшен толын огытыл. Тыгак калыкын 22 вуйшиймашыжым ончен лекме. 8-ыже пеҥгыдемдалтын. Начар йӱшаш вӱдым Гари, Савино, Кӱсола яллаште, Новый, Аэропорт, Суслонгер посёлкылаште, Звениговышто рашемдыме. Чыла верыштыжат ситыдымашым кораҥдаш кӱштымӧ. 42 протоколым возымо, 249 тӱжем теҥге штрафым тӱлыктымӧ, 4 скважине, уремысе 7 таве, 3 тӱшка таве дене пайдалнаш жаплан чарыме.