«Вож дене Российыште» руш тӱвыран Тӱнямбал фестивальже почылтеш

14-ше гыч 17-ше ноябрь марте Йошкар-Оласе Сеҥымашын 30-шо идалыкше лӱмеш тӱвыра полатыште «Вож дене Российыште» руш тӱвыран Тӱнямбал фестивальже эрта. Тудым Руш тӱвыра рӱдер тӱвыра министерствын полшымыж дене ямдыла. Тений тушко Казахстан, Беларусь эл, Саха, Чуваш республикыла, Белгород, Киров, Угарман областьла, Моско, Озаҥ, Воронеж, Пенза, Брянск олала гыч усталык коллектив да солист- влак толшаш улыт. 14-ше ноябрьыште 18 шагатлан кидпаша усталыкым ончыктышо выставке- ярминга почылтеш, пел шагат гыч фестивальым почмаш лиеш. 15-ше ноябрьыште 19 шагатлан Брянск гыч «Ватага» руш муро ансамбль да Пенза гыч «Миряне» ансамбль концертым ончыктат. 17-ше ноябрьыште 13 шагатлан сеҥыше- влакым саламлаш тӱналыт да гала-концерт лиеш.