Йошкар-Ола воктене кызытсе жаплан келшыше ече-роллер трассым торжественно почмо

Йошкар-Ола воктенсе «Корта» базыште кызытсе жаплан келшыше ече-роллер трассым торжественно почмо. Пайрем мероприятийыште республикым вуйлатыше Александр Евстифеев ден Российысе ече дене таҥасымаш федерацийын президентше Елена Вяльбе лийыныт. Лӱмлӧ ечызе шке жапыштыже республикым вуйлатыше деке трассым шотыш кондаш йодмаш дене лектын ыле. Регионым вуйлатышын кӱштымыж почеш, чоҥышо- влак кугу пашам шуктеныт. Кызыт тушто административный зданийым, кафем, вургемым вашталтен чийыме верым ыштыме, тӧр да шыма асфальтым шарыме, трассе мучко тул волгыдым ыштыме. Елена Вяльбе тыгай кӱчык жапыште чапле трассым ыштымылан Александр Евстифеевлан тауштен ойлен. Александр Евстифеевын мутшо почеш, тиде физкультура да спорт дене кылым кучымо инфраструктурын ик ошкылжо гына. Тыгай йӧнан сооружений- влак республике мучко лийшаш улыт. Кызыт республикыште кажне кумшо еҥ спорт деке кумылаҥын гын, ончыкыжым 50 процент лийшаш, - каласен республикым вуйлатыше.