Чигашево- Памъял электропередаче линийым пужен ыштыме

Марий Элыште 40 тӱжем еҥ электроэнергий дене ӱшанлын пайдаланен кертеш. Электросеть объект-влакым уэмдыме программе кышкарыште «Мариэнергон» специалистше- влак Чигашево- Памъял электропередаче линийым пужен ыштеныт. Тудо Йошкар-Ола, Звенигово да Волжский районла мучко эрта. Тиде линий 1959-ше ий годсек пашам ышта. Линийым пужен ыштыме паша кок ий шуйнен. Тушто 50 пу меҥгым кӱртньӧ- бетон меҥге дене вашталтеныт, 8 уштыш утла кужыт волгенче деч аралыше тросым ыштыме, вибрацийым иземдыме йӧным келыштарыме да моло пашамат шуктымо. Чылаже 24 миллион наре теҥге оксам кучылтмо. Олмыктымо деч вара 40 тӱжем еҥ электротул дене ӱшанлын пайдаланен кертеш. Нуно Звениговышто, Шолеҥгерыште, Памарыште, Красногрскийыште, Чакмарийыште, Кужмараште, Приволжскийыште илат. Тыгак тушто ятыр социал объект верланен.