«Марий мланде калыкше дене поян» выставке почылтеш
«Сымыктыш йӱдым» Евсеев лӱмеш калыкле тоштер у ончер дене куандара. «Марий мланде калыкше дене поян» выставке 3-шо ноябрьыште 17 шагатлан почылтеш. Экспозиций калыкын икоян улмо кечыже да республикын шочмо кечыжлан пӧлеклалтеш. Кызыт республикыштына 680 тӱжемат 380 еҥ уло. 2010-шо ийысе перепись почеш нунын коклаште 110 йылме дене кутырышо калык ила. Тушечын 52 национальностьшо 10 да шукырак еҥан улыт. Выставкыште марий, руш, одо, башкир, татар, кряшен, чуваш калык вургем, сӧрастарымаш, сурт кӧргыштӧ кучылтмо ӱзгар- влак ончыкталтыт. Тоштерын фондшо гыч 19-ше курым мучашысе да 20-шо курым тӱҥалтышысе фотодокумент материал- влакымат лукмо лиеш. Выставке «Сымыктыш йӱд» Россий кӱкшытан тӱвыра акций кышкарыште эрта.
