Пайрем кечын оласе калык кок пӧлекым налын

Теҥгече уло элна калыкын икоян улмо кечыжым палемдыш. А Марий республикылан кок пачаш пайрем лие: республикына эше шкенжыш 99 ияш лӱмгечыжым пайремлыш. Пайрем мероприятий- влак калыкын канаш йӧратыме Чавайн бульварым торжественно почмаш гыч тӱҥалыч. Тудым йӧршын манме гай уэш ыштыме. Тудо моторемше, кызытсе жаплан келшыше, шуко функциян йолын коштмо вер лийын. Тротуареш брусчаткым пыштыме, асфальт шартышым уэмдыме, бордюр- влакым уэмдыме. Бульвар мучко энергийым аныклыше фонарь- влак, у теҥгыл- шамыч вераҥдалтыныт. Эре телефоныш ончен коштшо-влаклан йол йымалне светофорым келыштарыме. Южо вере теҥгыл воктене ӱшыкым ыштыме, тудым гирлянде дене сӧрастарыме, вай-файым чӱктымӧ. Шуктымо пашам аклаш Республикым вуйлатыше Александр Евстифеев шке миен да погынышо калыкым пайрем дене саламлен. Тиде- калыклан кӱлешан кундем. Тудо шке тиде кундемым олмыкташ темлен.  Тыгай корно дене ончыкыжымат каяш тӱҥалына,- каласен Александр Евстифеев да шуктымо пашам кӱкшын аклен. Ынде тушан пушеҥге ден кушкылым шындаш кӱлеш, манын. Бульварын кужытшо ик меҥге утла. Пашан акше 44 миллион теҥгем эртен. Оласе калыклан эше ик пӧлекым ыштыме. Тыгак Сергей Чавайнын лӱмжым нумалше калыкле книгагудым, историй да тӱвыра памятник лӱман пӧртым, олмыктымо. Тудым 1938-ше ийыште чоҥымо. Тиде зданийымат Александр Евстифеев ончен лектын. Тудын тӱжвал могыржым, леведышыжым да кӧргӧ велымат уэмдыме. Пырдыжым, тувырашым чиялтыме, архитектура элемент- влакым пӧртылтымо, окнам, омсам, кӱварым вашталтыме, коммуникаций системым да электровоштырым уэш ыштыме. Пашан тӱшка акше 60 миллион теҥгеш шуын.