Марий Йӱштӧ Кугыза уэш Российысе 10 ойыртемалтше коча радамыш пурен
Теният специалист- влак Российыште турист- влак коклаште эн палыме Йӱштӧ Кугыза- влакын рейтингыштым ыштеныт. Эн ончыл 10 коча коклашке уэш марий Йӱштӧ Кугызат пурен. Йодыштмашым ТурСтат турист портал эртарен. Российысе Дед Мороз дене пырля лу палыме лӱм коклашке Татарстан гыч Кыш Бабай, Карелий гыч Паккайне ден Талви Укко, Бурятий гыч Саган Убген, Удмуртий гыч Тол Бабай, марий Йӱштӧ Кугыза, Мордовий гыч Якшамо Атя, Чуваший гыч Хел Мучи, Ямал-Ненец автоном округ гыч Ямал Ири, Тува гыч Соок Ирей пуреныт. Марий Йӱштӧ Кугыза ден Лумӱдырым Шернур районысо Кукнур селаште вашлияш лиеш. Тушто нуно 2012-шо ий гычак уна- влакым вашлийыт. Тидымат каласаш уто огыл: 18-ше ноябрьыште Российыште Дед Морозын шочмо кечыже палемдалтеш. Тудым саламлаш да У Ийлан пӧлекым йодын, серышым колташ лиеш. Тудын илемже Великий Устюг олаште верланен.