Шояк банкир- влаклан ида ӱшане

Эртыше каныш да пайрем  кечылаште Марий Элыште илыше- влак шояк банкир шамычлан 713 тӱжем теҥгем колтеныт. Пайрем кечын 8 еҥ полицийыш ондалкалымаш шотышто йодмашым возен. Нуно чыланат шояче- влаклан ӱшанен, оксаштым йомдареныт. Аферист- влакын мутышт почеш, пуйто клиентын банк картше гыч оксам наледат. Еҥ- влак оксам йомадараш огыл манын, картыштын реквизитшым увертареныт. Тыге окса деч посна кодыныт. А кӧ картын данныйжым увертараш тореш лийын гын, лӱдыкшыдымӧ счётыш оксам шкевуя кусараш темленыт. Але банкомат деке каен, осал еҥ- влакын ончыктымо счётыш оксам кусареныт. Тыге кажныже 17 гыч 248 тӱжем теҥге марте оксам колтылын. Чылаже 713 тӱжем теҥгеш погынен. Уголовный паша- влакым тарватыме.