Марий Элын калык поэтше Макс Майным шарналтат
28-ше февральыште Чавайн лӱмеш калыкле книгагудышто Марий Элын калык поэтше Макс Майнын произведенийже почеш «Шочмо кундемем, мый тыйым йӧратем» сылнысем да сылнымут композиций лиеш. Тудо 12 шагатлан тӱҥалеш. Композицийым писатель да поэтын ӱдыржӧ Светлана Чайка ямдылен да Сеҥымашлан 75 ий темме да республикын 100 ияш лӱмгечыжлан пӧлекла. Молан манаш гын, тудын ачаже Кугу Ачамланде сарын участникше да сылнымут пашаж денат республикым вияҥдымашке изи огыл надырым пыштен. Макс Майн сылнымут пашажым 1920-шо ийла мучашыштак тӱналын. 1934-ше ийыште йоча- влаклан возымо кок сборникше савыкталтын, вара поэзий книгаже лектын. 1942-шо ий тӱҥалтышыште сарыш каен, фронтовой газетлаште, республикысе «Родина верч» альманахыште савыкталтын. Сар жапыште кум книгам луктын. Светлана Максимовна тиде композицийым тыгак Медведевысе тоштерыште да Йошкар-Оласе «Ветеран» клубышто ончыкташ шона.
