Александр Евстифеев Самара областьыште Юл кундем округ Советын заседанийыштыже лийын
Марий Элысе 44 процент калык эре физкультура да спорт дене кылым куча. Каныш кече деч ончыч республикым вуйлатыше Александр Евстифеев Самара областьыште Юл кундем округ Советын заседанийыштыже лийын. Тудым полномочный представитель Игорь Комаров эртарен. Заседанийыште тыгак Российын Спорт министржын алмаштышыже Марина Томилова, Российысе генеральный прокурорын алмаштышыже Сергей Зайцев, регионлан губернаторышт да молат лийыныт. Погынышо-влак округышто тӱшка, йоча спортым да физкультурым вияҥдыме йодышым каҥашеныт. Президентын элысе калыкым физкультура да спорт дене шукырак авалташ, тидлан йӧным ышташ шындыме задачыже Российым вияҥдымаште значенийже пеш кӱлешан,- каласен Игорь Комаров. Спорт министрын алмаштышыжын мутшо почеш, показательыш шуаш «Спорт- илышын нормыжо» федерал проект йӧным ышта. Погынымаште тыгак инфраструктура, мероприятийым ямдылыме, кадр, уверым шарыме йодыш-влакымат каҥашыме. Калыклан спорт дене кылым кучаш илыме вер воктенырак йӧным ыштыман манын каласыме, школласе спорт площадке- влакымат кучылташ лийме нерген ойлымо. Марий Элыште тыгай йӧн уже кучылталтеш. Кодшо ийын 6 муниципал образованийыште изи спорт площадке- влакым чоҥымо. Тений ГТО площадке эше кум районышто лийшаш. Тыге спорт сооруженийым 60 процентлан ситарыме. Кугыжаныш программе 54 утла процентым йодеш. Республикым вуйлатышын Указше дене «Тазалык да спорт кечым» палемдыме, объект дене яра пайдаланен кертше еҥ- влакым рашемдыме. Республикыште физкультура, тазалыкым пеҥгыдемдыме да спорт пашам 910 тӧнеж шукта. Тыге физкультура да спорт дене тӱрлӧ ийготан 44 процент калыкым авалтыме. Деловой программе кышкарыште погынышо- влак «АВТОВАЗ» предприятийыш миеныт. Самара областьын губернаторжо Дмитрий Азаров ден АВТОВАЗ-ын президентше Ив Каракатзанис предприятий нерген каласкаленыт да Лада спецавтомобиль- влак дене палымым ыштеныт. Кумылан- влак нине машина дене коштын онченыт.
