Марий Элын у тӱҥ федерал инспекторжо Павел Волков дене палымым ыштеныт
Теҥгечак Конгресс- влак полатыште Марий Элын тӱҥ федерал инспекторжо Павел Волков дене палымым ыштеныт. Полномочный представитель Игорь Комаров Павел Волковым профессионал семын аклен. Тудын шинчымаш ден опытшо элым вуйлатышын шындыме задачым решатлаш полшаш тӱналыт манын. Игорь Комаров приоритет корно семын калыкле проект- влакым шыҥдарымым, экономикын кушмыжым, калыкын парышыже ешаралтмым терген шогымашым палемден. Павел Валерьевич 13 ий полпредство аппаратыште тыршен, кугу паша опытшо уло. Марий Элым вуйлатыше республикылан тиде кӱлешан событий манын. Молан манаш гын, полпредство институт кучемын ик эн тӱҥ ужашыже. Регионым вуйлатыше тымарте тӱҥ федерал инспекторлан ыштыше Пётр Журавлёвлан тауштен ойлен да у пашаште сеҥымашым тыланен. У Тӱҥ федерал инспектор палемден: у должность ответственностьым да кучемын чыла ужашышын чаткан пашам ыштымыжым йодеш. Федерал, регионысо да муниципал кучемын ваш умылен пашам ыштымышт годым гына задаче- влакым сайын шукташ лиеш,- каласен Павел Волков. Вара полномочный представитель, тӱҥ федерал инспектор да республикым вуйлатыше кум шӧрынан вашлиймашым эртареныт да республике ончылно шогышо тӱҥ задаче- влакым каҥашеныт. Александр Евстифеев тӱҥ паша- влак коклаште Марий калыкын 11-ше погынжым, Россий Конституцийыш тӧрлымаш верч йӱклымашым, Сеҥымашлан 75 ий теммылан да Республикын 100 ияш лӱмгечыжлан ямдылалтмашым палемден.
