Ульяновск оласе корно пашаеҥ- влак Йошкар-Оласе кок уремым олмыкташ тӱналыт

Ульяновск оласе корно пашаеҥ- влак Йошкар-Оласе кок уремым норматив марте шукташ тӱналыт. Красноармейский уремын Машиностроитель деч Йыван Кырла урем марте ужашыжым проект кышкарыште Ульяновск ола гыч «Автодор» предприятий олмыкташ тӱҥалеш. Тиде фирма гына электрон аукционыш темлымашым пуэн. Контрактын тӱҥалтыш акше 56 миллионат 500 утла тӱжем теҥге лийын. Автодор тудым 200 утла тӱжемлан волтен кертын. Ульяновскысо корно пашаеҥ- влакак кокымшо электрон аукционыштат сеҥышыш лектыныт. Тудыжо Пролетар уремын Вознесенский деч Машиностроитель урем марте ужашыже дене кылдалтын. Тыштыже кок претендент лийын. Ульяновск дене Чебоксарысе «Стройком» предприятий таҥасен. Ульяновск шулдырак акым темлен: 41 миллионат 300 утла тӱжем теҥгем. Тӱналтыш акше 41 миллионат 500 утла тӱжем теҥге лийын. Кодшо ийын лач Ульяновскысо корнызо- влак Первомай уремын ужашыжым олмыктеныт. Чувашийысе «Дорстройсервис» Карл Маркс ден Западный уремыште, «Марий Эл Дорстрой» Ленин проспектыште пашам ыштеныт. Тений Йошкар-Оласе ныл корнын ужашыжым норматив марте шуктышаш улыт. Комсомольский да Кремль урем- влакым эше торгышко лукмо огыл. Торгышто оксам аныклен кодаш йӧн лиеш гын, эше кок объектым тӧрлаш палемдыме.