Кугу Ачамланде сарын ветеранжылан 103 ий темын
Кугу Ачамланде сарын ветеранжылан 103 ий темын. Иван Алексеев 1917-ше ий 24-ше февральыште шочын. Ачаже колымеке, аваже ныл эрге да кугу озанлык дене шкетын кодын. Сандене Иванлан изи гычак шуко да неле пашам ышташ логалын. 8 классым тунем пытарымек, колхозешак пашам ышташ кодын. 1938-ше ийыште армийыш налыт да Архангельскысе пограничный отрядыште корабльыште служитлаш тӱналеш. Но сусыргымекыже тудым сухопутный отрядыш кусарат. 1943-шо ийыште кумшо Белорусский фронтыш колтат. Сарым Иван Алексеевич Таллиныште мучашла да сар пытымек ик ий гыч мӧҥгыжӧ пӧртылеш, ешым чумыра, колхоз председатель лиеш. 1961-ше ийыште ешыже Йошкар- Олаш илаш кусна. Тудо полупроводник прибор- влак заводыш паша пура да тушто 30 ий тырша. «Коммунистический пашан ударникше» да «Заводын паша ветеранже» чап лӱмым сулен налын. Ветеранлан Сеҥымашлан 75 ий темме лӱмеш шарнымашан медальым кучыктымо.
