Республикым социал-экономик велым вияҥдаш полыш лиеш
Российын чоҥымаш, илыме вер да коммунал озанлык министрже Владимир Якушев Йошкар- Ола мучко экскурсий дене коштын. Тудын дене пырля Республикым вуйлатыше Александр Евстифеев лийын. Нуно Брюгге да Амстердам серыште, Патриарший площадьыште лийыныт, 12 аппостол да вес шагатшымат онченыт, лӱмлӧ пырыс денат палыме лийыныт. Министр чыла ужмыжым кӱкшын аклен. Тиде олан сай ончыкылыкшо уло манын палемден. Минстройым вуйлатышын толмо кечын тӱҥ мероприятийлан кумдаҥдыме совещанийым шотлыман. Тушто вич корно дене эртарыме стратегий сессий- влакын пашаштым иктешлыме. Ынде мыланна технический пашам ыштыман манын тудо. Мом проектыште ончыктымо, мом тушко эше ешарен пурташ кӱлеш-рашемдена. Каҥашымаште социал сферым, туныктымо пашам, медициным, чоҥымашым, спортым, сымыктышым, ял озанлыкым да изи предпринимательствым вияҥдыме йодыш- влакым тарватыме. Владимир Якушев проблеме- влакымат ончыктен: коммунал озанлык палынак тоштемын. Сандене республикын темлымашыже- влакым поддержатлаш тӱналына. Электроэнергийлан тарифын кӱкшӧ улмыжым палемден. Тудо бизнеслан чаракым ышта. Тиде ситыдымашым ончен лекташ кӱлеш. Тыгак тудо Марий Элыш толмын лектышыже поян да ончыкыжо пырля пашам ышташ негыз лиеш манын. Тиддеч ончыч Владимир Якушев ден Александр Евстифеев Йошкар- Ола ден Медведево районышто икмыняр объектым ончен савырненыт. Эн ончыч Фестивальный, 9-ше «Б» микрорайоныш, Медведево посёлкыш миеныт. Илыме верым чоҥымаш канализаций сетьлан нелылыкым луктеш. Сандене Россий правительство полшымо дене у коллекторым чоҥаш кӱлеш. Чоҥалтше микрорайонлаште школ- влакымат нӧлташ палемдыме,- ешарен Александр Евстифеев. Россий министр федерал полышым налаш ӱшан кугу, полшаш тӱналына манын каласен. Вуйлатыше- влак Шоядӱр ял воктене посна пӧрт- влакым чоҥымо кундемышкат миеныт. Тушто корныш тыгыде кӱм шарыме. Тротуарым кумдаракым ышташ темлыме. Апшакбеляк ял кундемыштат инфраструктурым ышташ кӱлеш манын палемдыме. Оласе уремламат ончымо. Киров урем ден Строитель уремлам ушышо корным чоҥымо нергенат, тошто пӧрт- влакым кораҥдыме шотыштат ойлымо. Илаш йӧрыдымӧ пӧртлам план деч шукырак кораҥдыме годым, республике ешартыш оксам налеш,- каласен министр. Кундемын туризм потенциалжымат кӱкшын аклыме. Республикым писын социал-экономичеки вияҥдыме планым сайлан шотлымо. Тудо регионым вияҥдаш сай шӱкалтышым ыштышаш. Ямдылыме документ варарак Россий правительствыш ончаш пуалтшаш.