Тӱнямбал танк биатлонышто марий рвезе сеҥаш полшен

Моско воктелсе Алабино олаште АрМИ-2019 визымше Тӱнямбал военный таҥасымаш кышкарыште танк биатлон эртен. Тушто 39 эл гыч военнослужащий- влак таҥасеныт. Ӱчашымаш- влак 10 кугыжаныш кундемыште 25 военный полигонышто лийыныт. Танк биатлонышто кажне эл деч кум экипаж таҥасен. Россий сборныйын ик танкшын командирже Марий Эл гыч  лейтенант Дмитрий Иванов лийын. Лач тудо шке йолташыже- влак дене пырля пӱтынь командылан сеҥымашым кондаш полшен. Морко районысо Купсола ялын шочшыжо Дмитрий Иванов Коркатово лицейым тунем пытарымеке, шке кумылын Озаҥысе танк училищыш тунемаш пурен, кодшо ийын тунем пытарен.