Российысе чоҥымаш министр Марий Элыш толын
Таче Российысе чонымаш министр Владимир Якушев паша дене Марий Элыш толын. Тудо республикын кураторжылан шотлалтеш да верысе кучемын еҥже- влак дене регионым писын вияҥдыме йодышым каҥаша. Тудыжо экономикын кӱлешан сферыже- влакым нӧлталаш, инвестицийым кугемдаш, социал илышыште улшо йодыш- влакым виктараш да калыкле проект- влакым шыҥдараш полшышаш. Владимир Якушев Марий Элысе кучем дене вашмутланымашым кӱлешанлан шотлен. Республикым вуйлатыше Александр Евстифеев республикылан тӱткышым ойырымылан Владимир Якушевлан тауштен ойлен. Республикылан тиде кок пачаш кӱлешан. Молан манаш гын, те федерал министр улыда. Адакшым- Российысе ик эн ончыл губернатор. Тендан опытла мыланна пайдале лиеш,- манын Евстифеев. Йошкар- Олашке тыгак моло кундемлашке пашаш ушымо исполнительный кучемын федерал органжын еҥже- влакат толыныт. Минстройым вуйлатыше палемден: Мемнан ончылно шогышо задаче- влак раш улыт- республикым социально-экономически вияҥдыме программе. Паша кече жапыште республикын шындыме задаче- влакым ончен лектына, куштыжо полышым пуаш кӱлеш – мутланымаште рашемдена. Министр иктешлен- кажне решений тыге мучашлалтшаш- регион экономик потенциалым нӧлталмашке лекшаш. Республикым вуйлатыше Александр Евстифееват палемден: республикылан социал-экономик вияҥмаш прогамме кӱлешан. 2017-ше ийыште ме иктешлымашым ыштышна. Республикын парымже 20 миллиард теҥге ыле, а бюджетше 20 миллиард теҥге деч шагалрак лийын. Кызыт правительстве ситуацийым тӧрлаш чолган пашам ышта. Тиддеч посна улшо проблеме- влакымат ушештарен. Чыла шотыш налаш гын, моло регион- влак дене таҥастарымаште социал-экономик вияҥмаште ойыртемым ешартыш окса полыш деч посна пытараш ок лий. Финанс дисциплина шукталтеш. 2018-ше-2019-ше ийлаште республикын парымже палынак иземын. Российын чоҥымаш министрже нӧлтымӧ объект- влакым ончен савырнен. Медведево районышто чоҥалтше у кварталыш миен. Тысе инфраструктурылан полшаш кӱлеш. Тиде сферыште регионын сай ончыкылыкшо уло манын палемден. Тиддеч посна Йошкар-Олаште эҥер серыште лийын. Верысе чоҥымо комплексын пашам ыштымыже сай шонымашым луктеш, манын тудо. 1-ше июль гыч илыме верым чоҥаш оксам ойырымо у йӧныш куснымо. Тӱҥалме объектым тошто семынак чоҥен пытарыман, а у пашам тӱҥалаш проектный финансированийлан чоҥышо- влак банкыш каят. Куандара- Марий Элын пеш сай чоҥымо комплексше уло. Тудо умбакыжат илыме верым утларак чоҥаш йӧным пуа, а мланде шотышто йодыш уке. Но моло кундемысе семынак, чоҥаш кугу йодмаш уке. Тидым калыкле проект- влак кышкарыште виктарен колтыман. Калыкын парышыже кушкеш гын, илыме верланат йодмаш ешаралтеш.