Волжск оласе йоча садлаште вер ситыдыме йодыш кораҥдалтшаш
Волжск олаште эн кугу йоча сад сентябрьыште шке омсажым почшаш. Тудым 6-шо школ пелен школ деч ончычсо пӧлка семын ыштыме. Тӧнежым 320 йочалан келыштарыме. Кызыт тушто паша шолеш веле. Кӱлеш оборудований ден мебельын кугурак ужашыжым кондымо. Кадрым ситарыме да йоча- влакым налме йодышат виктаралтеш. Кум пачашан у полатыште ныл ясле группо верлана, медицина пӧлем да кочмо вер, спорт да модмо зал, психолог ден логопедын верышт лийыт. Тӱжвалныже кызыт кушкылым шындат, верандым ыштыме, тулым пуртымо, модыш пӧрт- влак улыт. У садикым чоҥаш 190 миллион наре теҥге оксам ойырымо ыле. Тӧнежым пашаш колтымо дене оласе йоча садлаште вер ситыдымаш йодыш кораҥдалтшаш.