Марий Элыште наркотикым ыштыше лабораторийым петырыме
Россий МВД-н наркотикым шаркалымым тергыме виктемже Марий Элысе коллегышт дене пырля, «Гром» спецназын полшымыж дене осал пашам ыштыше тӱшкам кученыт. Нуно наркотикым да психотропный веществам ямдылымылан, аралымылан, шупшыктымылан да шаркалымылан титаклалтыт. Рашемдыме: нунын ончылъеҥышт Марий Элыште шолып лабораторийым ыштен. Тушто тудын полышкалышыже синтетик наркотикым ямдылен. Моско областьыш кугу тӱшка дене шылтыкан автомобиль шупшыктен. Тушто фасовкым ыштеныт да Люберцы, Пушкино, Королёв, Щёлково, Красногорск, Подольск, Долгопрудный да Воскресенск олалашке колтылыныт. Верлаште тарлыме еҥ- влак кажне кечын 500 утла вере палемдыме верлаш оптеныт. Еҥ дене ваш ужде, интернет гоч ужалкаленыт. Налше- влак мыняр да могай кӱлешым каласеныт, лӱмын ыштыме колл-рӱдерын операторжо- влак кузе тӱлаш лийме нерген уверым колтеныт. Оксам электрон тӱлымӧ системе гоч тӱленыт. Окса толмеке, шылтыме верын кушто улмыжым каласеныт. Кугу операцийым эртарымылан кӧра, Моско областьыште да Марий Элыште 21 еҥым да вуйлатышыштым, чолга еҥыштым, курьерыштым, ямдылыше да шаркалыше- влакым кученыт. Нуным наҥгаяш Росгвардийын посна самолётшым кучылташ верештын. Тергымеке, 20 килограмм тӱрлӧ наркотикан настам, лабораторный оборудованийым поген налме. Тиддеч посна пычалын обрезшым, патрон- влакым верештме. Уголовный пашам тарватыме. Чылаштымат петырымаште кучат. Кызыт тергымаш да шымлымаш- влак каят.