Марий Эл Правительствын «Калыкын чонжо» премийжым тений кӧ налеш?

Марий Элын Правительствыже калык усталык самодеятельный коллектив- влакын вуйлатышышт да солистышт, калык кид-паша мастар-влаклан «Калыкын чонжо» куд премийым пуаш палемден. Тидын шотышто пунчалым Республикым вуйлатыше пеҥгыдемден. «Калык куштымаш» номинацийыште Куженерысе йоча сымыктыш школын кушташ туныктышыжо, йоча образцовый ансамбльым вуйлатыше Антонида Иванова налеш. «Калык мурымашлан» премийым У Торъялысе тӱвыра да каныш рӱдерын «Эхо» эстрада муро студийын художественный вуйлатышыже Елена Росляковалан пуаш ыштыме. «Калык тӱвыра» номинацийыште Звенигово районысо Ташнур тӱвыра пӧртын заведующийже, «Алан» фольклор ансамбльым вуйлатыше Алексанй Дружинин палемдалтын. «Калык семӱзгар сем» номинацийыште Курык марий районысо Микрак тӱвыра пӧртын кӱслезе- влак калык ансамбльжым вуйлатыше Фелицата Эшметова палемдалтын. «Театр усталык» номинацийыште У Торъялысе клуб системын фольклор шотышто специалистше, «Оваций» театр студийым вуйлатыше Надежда Ефремовалан пуымо. Оршанке районысо Тошто Крешын ялысе Ремесло пӧртым вуйлатыше Виталий Кудрявцев «Кид-паша сымыктышыште калык мастар» номинацийыште премийым налеш.