Марий Элым вуйлатыше Перинатал рӱдерым чоҥымо годым калыкын шонымашыжым шотыш налаш кӱштен

Марий Элым вуйлатыше Александр Евстифеев Перинатал рӱдерын кӱкшӧ технологиян корпусшым чоҥымо шотышто совещанийым эртарен. Тудым чоҥымо йодышым вуйлатыше тӱшка колыштмашке лукташ темлен. Тиде паша виш лийшаш да калыкын шонымашыжым чотыш налман. Колыштмашке кугурак- влак дене пырля, поснак, самырык еш- влакым ӱжман. Молан манаш гын, министерствын мом ыштымыжым калык ок пале. Тудлан каласкалыман, служебный тайна семын кучыман огыл. Мемнан дорожный картына уло. Туддеч кораҥаш шонымаш уке. Правительствын тыршымыжлан кӧра, рӱдерым 21-ше ийыште огыл, а вес ийынак чоҥаш тӱҥалаш йӧн лектын. Тазалыкаралтыш министр Марина Панькован мутшо почеш, ойырымо оксан кугытшым пеҥгыдемдыше серыш толын. Федерал субсидий 772 миллион утла теҥге лиеш, республикын бюджетше 32 миллионым ешара. Тиде окса чоҥаш да оборудованийым налаш кая. Тиде объект тыгай смета дене республикыште икымше гана чоҥалтеш. Сметын акше ик миллиардат 500 миллион утла теҥгеш погына. Республикыште бюджет окса дене тыгай объектым чоҥымо огыл. Чыла каҥашыме йодышым эртарымеке, икымше чоҥымо пашам март  тӱҥалтышыште тарватышаш улыт. Республикым вуйлатыше объектым чоҥымым эре терген шогаш сӧрен.