Йоча-влакын мурымаш конкурсышт лиеш
Шушаш каныш кечылаште Палантай лӱмеш тӱвыра да сымыктыш колледжыште «Йоча жапын йӱкшӧ» мурымо сымыктыш специальность дене 8-ше Республикысе конкурс эрташ тӱҥалеш. Тушто кок номинаций лиеш. Тиде -«Академически мурымаш» да «Калык мурымаш». Таҥасымашке 230 ӱдыр-рвезе толшаш. Нунын коклаште республикысе 20 сымыктыш школ гыч 94 солист, 19 ансамбль улыт. Тыгай конкурс кок ийлан ик гана эртаралтеш. Жюри радамыште лӱмлӧ артист да тӱвыра пашаеҥ- влак улыт. Жюрим Озаҥысе консерваторийын доцентше, Татарстанын сулло артисткыже Гульнара Мурзиева вуйлата.