Сад-пакчам кучышо- влак электроэнергийым келшыше ак дене налаш тӱҥалыт
Сад-пакчам кучышо- влак электроэнергийым келшыше ак дене налаш тӱҥалыт. Марий Элым вуйлатыше правительствын еҥже да электросеть компанийын представительышт дене совещанийым эртарен. Пакча тургым лишемме годым сад товариществе- влаклан электротулым ситарыме йодыш ончыко лектеш. Александр Евстифеев палемден: Медведево район да Йошкар-Олаште илыше кугурак тукым пакчазе- влаклан электроэнергийым кӱлеш наре да келшыше ак дене ситарыме йодыш пӱсын шога. Ял озанлык министр Александр Гречихо увертарен: республикым вуйлатышын кӱштымыж почеш, садовод кооператив- влакын сетьыштлан инвентаризацийым ыштыме да обслуживатлыше организацийым рашемдыме. Промышленность министерствын уверже почеш, кызыт сад участкым кучышо- влак туллан оласе калык семынак тӱлат. Но эше электросеть озанлыкым кучымылан ешарен налыт. Тидыже тӱлымӧ акым кугемда. Сандене сад-пакча- влаклан у организацийым ышташ темлымаш йоҥген. Но республикым вуйлатыше тидлан тореш лийын. Пакчазе- влаклан тӱҥжӧ- электртул ӱшанлын толжо да тариф ынже куш. Сандене йӧнан лийже манын, вуйын шогышо ик организацийым палемдыман, - каласен тудо да Центр да Приволжьен МРСК-жын генеральный директоржо, «Мариэнерго» филиалын директоржо Дмитрий Фёдоровым тиде пашашке ушнаш йодын. Фёдоров тиде пашам шукташ компанийын ресурсшо ситыше манын вашештен. Республикым вуйлатыше тиде йодышым ик арня жапыште рашемдаш кӱштен.