Доброволец- влак ямдылымашым «Авангард» рӱдерыште эртарен кертыт

             Специальный сарзе операцийыш каяш доброволец- влак ямдылымашым «Авангард» рӱдерыште эртарен кертыт. Тыгай темлымашым Марий Элым вуйлатыше Юрий Зайцев самырык тукымым сарзе да патриотизм шӱлышеш шуарыме «Авангард» рӱдерыш мийымыже годым ыштен. Тушто тудо туныктымо да шуарыме пашам кузе виктарымым, сборыш толшо рвезе- влакын илыме йӧныштым ончен. Рӱдерын директоржо Борис Салдаевын мутшо почеш, идалык мучко кугурак класслаште да профессионал тунемме тӧнежлаште тунемше рвезе- влак дене вич кечаш сбор эртаралтеш. Тиддеч посна школ каникул жапыште военно-патриот да профилян смена- влак чумыралтыт. Правительствын полшымыжо дене олмыктымо пашаш шукталтеш, кӱлешан оборудований ден мебель налалтеш. Мутлан, 2020-шо ийыште 10 миллион утла теҥгем ойырымо гын, кодшо ийын 37 миллионым, тений 33 миллионым колтымо. «Авангард» Оборона министерствын да элым вуйлатыше- влакын шындыме задачым шукта. Марий Элым вуйлатыше самырык тукымым шуарыме шотышто пашам сайын аклен да специальный сарзе операцийыш кайышаш доброволец- влакым ямдылаш кучылташ лиеш манын.
             Фото: Марий Элым вуйлатышын организаций да аналитик виктемже.