Марий Элыштына таче вич тӱжем утла туныктышо поро саламлымашым налеш

              Марий Элыштына таче школысо вич тӱжем утла туныктышо поро саламлымашым налеш. Маристатын ончыктымыжо почеш, 2021-ше ийыште частный да кастенсе школлам шотыш налын вич тӱжемат 18 туныктышо пашам ыштен. Нунын кокла гыч 591 еҥ руш йылме ден сылнымутым туныкта, Российысе калык- влакын йылмышт да сылнымутышт дене 155 еҥ шинчымашым пуа, историйым, экономикым, правом да обществознанийым 306 еҥ вӱда, математике дене 459 еҥ шинчымашым пуа, физикым 147, химийым 132, географийым 97, биологийым 149, йот йылмым 523, информатике ден ИКТ-м 93 еҥ туныкта.
          Марий Элыште 8 тӱжем утла педагог жап деч ончыч пенсийым налеш. Таче тӱня мучко туныктышын кечыже палемдалтеш. Йоча тӧнежлаште туныктымо пашам шуктымаш страховой пенсийым ончылгоч налаш правам пуа. Республикыштына 8 тӱжемат 212 педагог тиде права дене пайдаланен. Тушечын 7 тӱжем утлаже ӱдырамаш, тӱжемат 145-ше пӧръеҥ улыт. Жап деч ончыч пенсийым 25 ий стажым погымеке пуат. Тений стажым поген шуктышо- влак пенсийыш 2026-шо ийыште лектыт.
           Фото: Туныктыш министерстве.