Балетлан туныктышо- влакым республикыштак ямдылат
Республикыштына балетлан туныктышо- влакын икымше выпускышт лийын. Эрик Сапаев лӱмеш опера да балет академический театрыште Палантай лӱмеш тӱвыра колледжын «Хореографий сымыктыш» пӧлкажым тунем пытарыше- влаклан да балетым ончыкылык туныктышо- влаклан дипломым торжественно кучыктымо. Икмыняр ий ончыч театрысе балетын артистше- влак кӱшыл шинчымашым Москосо ГИТИС-ыште налыныт. Тений Марий Кугыжаныш университет балетын икымше педагогшо- влакым туныктен луктын. Тӱвыра министр Константин Иванов палемден: ме шкенан республикыште балет шинчымашым тичмаш пуэна. Тиде шарнымашан кече. Ме у саманыш тошкална. 10 студент: 8-ыже Марий Эл гыч, кокытшо Чуваший гыч, кӱшыл шинчымаш нерген дипломым налыныт. Ынде марий да чуваш балетын артистше- влак тичмаш права дене туныктен, шке шинчымашыштым молылан пуэн кертыт. Дипломым театрын самырык артистше- влакланат пуымо. Бауманский лицей пелен Палантай лӱмеш тӱвыра да сымыктыш колледжын «Хореографий сымыктыш» пӧлкажым тунем пытарыше- влак документым кидыш кученыт. Нуно икмыняр ий театрыште куштат, но ынде театр сценыш дипломан специалист семын лектыт.