Компьютер дене таҥасыше пенсионер- влак республикын чапшым аралаш тӱҥалыт

 Марий Элыште пенсионер- влак коклаште  компьютер многоборье дене чемпионатын регионысо сеҥышыже- влакым палемдыме. Россий кӱкшытан 10-шо чемпионатын республикысе йыжыҥже июнь мучаш марте эртен. Таҥасымашке пӱтынь республике гыч 25 пенсионер ушнен. Нине илалше еҥ- влак лӱмын эртарыме курслаште компьютер дене пайдаланаш тунемыныт. Социал вияҥмаш министерствын увертарымыж почеш, эн шуко баллым теве кӧ поген: «Пайдаланаш тӱҥалше» номинацийыште Советский район гыч Лидия Кутасова ден Шернур район гыч Виктор Яблонский, «Ӱшанлын пайдаланыше-влак» коклаште Советский район гыч Светлана Акпулатова ден Оршанке район гыч Николай Иванов. Регионысо йыжыҥыште сеҥыше- влак 8-ше гыч 10-шо июль марте онлайн-йӧн дене республикын чапшым 10-шо Россий чемпионатыште аралаш тӱҥалыт.