Марий Элыште Конституций верч йӱклымаш кузе эртен?
Теҥгече элна мучко Россий Конституцийыш вашталтышым пуртымо шотышто йӱклымаш эртыш. Вашталтыш верч республикыштына сайлыме участкыш толшо 75 тичмашат 76 шӱдаш процент еҥ йӱклен. Вашталтышым пуртымо ваштареш 23 тичмашат 43 шӱдаш процент шке йӱкшым пуэн. 25-ше июнь гыч 1-ше июль марте республикыштына йӱклаш праван еҥ- влак кокла гыч 61 тичмашат 86 шӱдаш процент еҥ йӱклымашке ушнен. Кугу чолгалыкым Волжский районысо калык ончыктен-84 тичмашат 16 шӱдаш процент. Туддеч вара Параньга, Юрино да Килемар район- влак улыт. Шагалрак еҥ Козьмодемьянскыште да Волжск олаште йӱклаш миен: 65 процент утла, Йошкар-Олаште 46 наре процент еҥ шке шонымашыжым каласен.