Июль республикыштына чодыра пожар дене тӱҥалын
Июль республикыштына чодыра пожар дене тӱҥалын. Икымше июльышто Юрино лесничестве кундемыште вигак кум вере тул пижын. Но нуным шке жапыштыже ужын да йӧртен шуктымылан кӧра кугу кумдыкыш шарлен шуктен огыл. Кум пижме вержынат тӱшка кумдыкшо 15 сотыкыш погынен. Тений тул пижме лӱдыкшӧ тӱҥалме годсек республикыштына 16 чодыра пожарым рашемдыме. Тушечын 14-ше кугыжаныш чодыра фондышто, кокытшо «Марий чодыра» калыкле паркыште лийын. Чылаже тул вич гектар утла кумдыклан эҥгекым конден. Чыла вережат тул пижмын амалжылан еҥын титакше шотлалтеш. Иктыже гына волгенче рашкалтымылан кӧра пижын. Кодшо ийын кокымшо июль марте 38 чодыра пожарым регистрироватлыме ыле. Тудо 46 гектар чодылалан эҥгекым конден.