Полдыран дене кучедалмашке прокуратурат ушнен
Республикыштына Сосновскийын полдыранже манме шудо дене кучедалмашке прокуратура ушнен. Тудын чот шарлыме вер- влакым прокуратура терген лектын. Тиде кушкыл корно тӱрыштӧ, пайдаланыдыме мландыште, сад-пакча кундемлаште утларак кушкеш. Полдыранын айлыме кумдыкшо республикыштына 549 гектарым эрта. Тиде кушкыл аяранлан шотлалтеш, коваштым чот когартен кертеш. Тудым озанлыкыште кучылтмо реестр гыч лукмо да шӱкшак кушкыл радамыш пуртымо. Ял вокене кушмыж годым калыклан лӱдыкшым луктеш. Федерал закон почеш илем кундем- влак санитар правл дене келшен толшаш улыт. Тений полдыран дене кучедалдыме илем-влакым палемдыме: Провой велысе Кужмара ден Чакмарий, Медведево велысе Озакъял, Волжскийысе Памар, Параньга илемлам вуйлатыше- влаклан прокурор-шамыч представленийым луктыныт. Курыкмарий районысо 10 ял илем да район администрацийлан законым шуктымо шотышто уверым колтымо. Ушештарена: тений тиде осал кушкыл дене кучедалаш республикыштына ныл миллион утла теҥге оксам ойырымо.