Марий Элым вуйлатыше Кугыжаныш автоинспектор- влакым профессионал пайремышт дене саламлен.

Республикым вуйлатыше Александр Евстифеев ГИБДД-н ветеранже да сотрудникше- влакым тачысе профессионал пайремышт дене саламла. Регионым вуйлатыше палемден: автоинспектор- влак сутка мучко пашам ыштат да шке сомылыштым кӱлеш семын шуктат. Нунын пашашт деч калыкын илышыже да тазалыкше шога. Кӱкшӧ профессионализмышт, чытымашышт да тӱрлӧ ситуацийым вашке виктарен колтен моштымыштлан кӧра корно полицейский- влак шындыме задачым чаткан шуктат. Корнышто машина кажне ийын ешаралт толеш, тыгеже тендан пашадат шукемеш,- каласен Александр Евстифеев. Тидымат ешарен: коронавирусын пандемий жапыштыже кугыжаныш автоинспектор- влак кӱкшӧ ответственностьым ончыктеныт да инфекций дене кучедалмашке кугу надырым пыштеныт. Транспортын чарныде коштмыжо урем ден корнылан могайрак улмышт дечат шога. Калыкле проект- влакым шыҥдарымаш тидын шотышто сай вашталтышым ыштышаш. Республикыштына тений гына 140 меҥге кужыт автомобиль корным олмыкташ палемдыме. Тушечын 15 меҥгыже Йошкар-Ола агломерацийын урем корныжо- влак. 2024-ше ий марте 35 процент корным норматив марте шуктыман. Республикым вуйлатыше ӱшанен каласен: пашам йӧратымаш да тудым ыштен моштымаш ГИБДД пашаеҥ- влаклан шке профессионал порысыштым умбакыжат кӱлеш семын шукташ йӧным ыштат.